Salma Yasserالسفر عبر الزمن حلم لناس كتير في كل مكان في الدنيا وبالذات اللي بيحبوا افلام الخيال العلمي ومتأثرين بالمشاهد اللي البطل بيقدر يروح للمستقبل او يرجع لأزمنه مختلفه من الماضي ، وكان اتكلم الكاتب والعالم الفيزيائي بيتر ميلنغتون عن موضوع السفر عبر الزمن في مقال كان كتبه واتنشر علي موقع “ساينس أليرت” الأمريكي، وده كان بعد قراءته لكتاب “أجوبة مقتضبة عن أسئلة كبيرة” للمؤلف و عالم الفيزيا البريطاني ستيفن هوكينغ .
وهوكينغ كان شايف أن السفر عبر الزمن ممكن من الناحية العملية، لكن ممكن ميكونش هو ده الوقت اللي نقدر نسافر فيه بين ازمنه مختلفه لان التكنولوجيا اللي في ايدينا متسمحلناش اننا نبني آلة للزمن دلوقتي ، لكن ممكن جدا في المستقبل السفر عبر الزمن يكون حاجه عاديه ، يعني تبقي قاعد زهقان ومش لاقي حاجه تعملها وتقرر تاخد واحد صحبك وتسافر 7000 سنه لزمن الفراعنه وتتمشي جنب الاهرامات بالعجله الحربية او تسافر لعصر المماليك وتشوف شجرة الدر وعز الدين ايبك وهما بيتخانقوا .
لغز الصورة
نيجي بقي لواحده من الالغاز العجيبة اللي حيرت العلماء .. الصوره دي كانت سنة 1941 في حفلة افتتاح جسر ساوث فورك في كندا .. بس لو ركزت هتلاقي في شخص شكله مش زي باقي الناس وهتلاحظ ده من لبسة ونظاراته الشمس الحديثة اللي باين عليها انها من العصر بتاعنا مع ان كل اللي في الصوره لابسين لبس بستايل قديم .
بس لما العلماء درسوا موضوع الصوره الغريب ده قالوا ان مممكن يكون في ناس في الوقت ده بيلبسوا زينا بس مش كتير وان كان في نضارات شمسية ظهرت لأول مرة في العشرينيات في القرن اللي فات ، ولما تشوف صوره الشخص ده هتلاقيه لابس تيشيرت مطبوع عليه .
لكن بعد ما الصوره اتحطت تحت بحث دقيق لقوا ان العلامه اللي علي التيشيرت دي متخيطه ومش مطبوعه ، وبرضوا قالوا ان كان في نوع من الملابس اللي كانت بتلبسها الفرق الرياضية في الفترة دي ، وخاصتاً التيشرتات اللي كان بيلبسها فريق مونتريال مارونز لهوكي الجليد وفِي العصر ده ، وبرضو بحثوا موضوع ان الصوره تكون فيها اي استخدمات لبرامج تعديل الصور لكن لقوا ان الصوره سليمه ومدخلش فيها اي تعديلات .
لكن بالرغم كل التحليلات اللي قالها العلماء وبتفسر الصوره الغريبة دي بس هتفضل الصوره من اغرب الصور في العصر الحديث ، وعايز اقولكم ان الناس اللي بتحب السفر عبر الزمن ومتأثرين بيه مقتنعين 100 % ان ده شخص سافر من عصرنا الحالي للماضي سنه 1941 بطريقه معينه مجهوله لسه احنا متعرفهاش .
هيفضل الموضوع لغز من الالغاز العجيبة الي في الدنيا .
المصدر : من هنا
ScholarZones
