Salma Yasser
بيرو من البلاد اللي مخطط اني اسافر لها علشان اشوف ال “ماتشو بيتشو”، وهي واحدة من عجائب الدنيا السبع. وعلشان اشوف خطوط نازكا، اللي موجودة في الجزء الجنوبي من بيرو ، وبما ان في ناس كتير مسمعتش عن خطوط نازاكا فتعالوا احكيلكم عنها .
خطوط نازاكا عبارة عن أشكال هندسية وأشكال حيوانات، منتشرة لمسافات طويلة عبر هضبة بامباس دي جومانا القاحلة، و بعضها بيمتد إلى 370 متر يعني زي طول مبنى “إمباير ستيت” بنيويورك.
و خطوط نازكا حوليها غموض كبير تحس انها وراها اسرار والغاز محدش قادر يحلها وبالرغم من وجود الأشكال الجيولوجية دي في الرمال من حوالي القرن الميلادي الأول ، لكنها مكنتش معروفة لحد أوائل القرن العشرين ، وظهرت نظريات كتير عن معني الخطوط دي وازاي وصلت لهناك . . والخطوط دي مدرجة ضمن قائمة موقع التراث العالمي لليونسكو من سنة 1994 ، وبتختلف أشكال الخطوط لما بتشوفها من الجو…وأُطلق على بعض الخطوط ألقاب , زي (طائر الدوري و الإجوانا و الزهرة) وبيكون علي حسب ما تبدو عليه أشكال الخطوط ، ومع أن شعب الإنكا كان اكتر مجموعة بشرية مشهورة عاشت في بيرو في الفترة التاريخية اللي كانت قبل كولومبوس، لكن برضو شعب نازكا كان عنده حضارة مزدهرة في الصحرا فضلت مئات السنين.
وكان شعب بيرو بيعتقد ان الخطوط دي بتوضح دورات فلكية زي الأبراج وحركات النجوم لكن الأبحاث الحديثة بينت أنها مرتبطة بالطقوس أو المياه ، وفي نظريات بتقول انها اترسمت عن طريق الفضائيين ، ونظريات بتقول ان من الممكن تكون الخطوط عنصر من عناصر ممارسة روحية يسير الأشخاص فيها على نفس المسارات بشكل متكرر لتعميقها.
ولما دورت عرفت اني علشان اوصل لخطوط نازكا هحتاج اسافر إلى ليما عاصمة بيرو وبعد كدا اسافر 400 كيلومتر بالسيارة أو اتوبيس عبر طريق “Pan-American” السريع إلى مدينة باراكاس الساحلية وعرفت ان في هناك فنادق كويسه جدا للإقامة فيها زي DoubleTree من منتجع هيلتون وفنادق كتير لان في عدد كبير جدا من السياح بيروحوا علشان يشوفوا الخطوط الغريبة.
و أفضل طريقة علشان اقدر اشوف خطوط نازكا هي من الجو. وفي رحلات جوية كل يوم ، و الرحلة اللي بتغادر من مطار بيسكو بتاخد وقت حوالي 75 دقيقة.
اسيبكم تتفرجوا علي الصور اللي من 1900 سنة تقريبا وتنبهروا بجمالها .
