حكاية قرية كاليتشي بكازاخستان

عايز تسمع قصة غريبة ؟
هات فنجان القهوه بتاع الصبح وتعالي احكيلك. .

في قرية اسمها “كاليتشي” في كازخستان حصل فيها حاجة غريبة أوي سنة 2010. .

الناس كانت بتنام علي نفسها ، يبقي واحد ماشي في الشارع وفجأه ينام ، ويدخل في نوم عميق ومحدش يعرف يصحيه والعجيب أن النوم بيستمرلأيام وممكن يوصل لأسبوع كامل ،ولما يفوق يكون عنده صداع ومش فاكر اي حاجة !

الحالة دي كانت بتحصل في كل مكان ، واحد قاعد في شغلة وفجأة يحط راسة علي المكتب ويروح في النوم ، واللي ينام وهو في الشارع واللي تنام وهي بتتفرج علي التلفزيون وحالات كتير بيحصلها كدا , أكثر من 130 حالة نوم مفاجئ من أصل 680 اللي هو إجمالي عدد سكان “كاليتشي”. .

اللي حصل كمان أن الحالة أتطورت، وبعض سكان القرية بقوا يتصابوا بسكتة دماغية وهما نايمين ، وسنة 2014 حصلت حاجة غريبة ، كان في مجموعة طلاب في المدرسة والمدرس بيشرحلهم وفجأة ناموا كلهم ومفقوش من النوم غير بعد يوم كامل ، بس الاطفال دي لما فاقوا حكوا انهم شافوا هلاوس غريبة زي دخول أفيال عليهم في المدرسة وشافوا تلاجات بتقع من السقف . .

حالة النوم المفاجئ دي اصابت الرجالة والستات والناس الكبار في السن والاطفال الصغيرين وحتي الحيوانات كانت بتنام علي نفسها ، تلاقي الكلب ماشي في الشارع في أمان الله وفجأة ينام نوم عميق لحد ما يفوق ويكمل ماشي تاني عادي .

أية بقي اللغز الغريب ده؟ هل ممكن الماية اللي بيشربوها في القرية يكون فيها حاجة؟ طيب ليه لما بيصحوا بيكونوا فاقدين الذاكرة ؟ وليه عندهم هما بس في القرية ؟

أسئلة كتير جدا بتتسأل ومفيش أجابة ، والناس بقت تقول أحتمالات كتير يمكن يوصلوا لحل اللغز الغريب ده ، في ناس قالت روسيا بتجرب دوا جديد على سكان القرية من غير ما يعرفوا، وإن دي آثار جانبية ليه ، وناس تانيه قالت ان الموضوع له علاقة بالفضائيين وسكان من كواكب تانية هما اللي نزلوا علي القرية دي وده تأثيرهم علي الناس والموضوع سخن اوي بقي وناس قالت أن ممكن الفضائيين دول كان بيسرقوا وعيهم، ويسجلوه عشان يعرفوا طريقة تفكير البشر وبعد كدا بيرجعوا وعيهم وعلشان كدا كان لازم يفقدوا الذاكرة عشان الناس متحكيش اللي شافوه. .

العلماء بدأوا يدرسوا الموضوع وبدأوا يقولوا أسباب زي ان الفودكا اللي بتيجي للقرية قوية شويه وبتخلي راسهم تقيلة وبتدخلهم في حالة النوم دي ، ورجعوا تاني لقوا ان في أطفال وحيونات كمان بيحصلها كدا واكيد الاطفال والحيوانات مش هتشرب خمرة ، فبكذا الاحتمال ده كمان منفعش.

الأطباء قالوا أن قرية “كاليتشى” أو”القرية النائمة” مصابة بوباء النوم الغامض “Sleepy Hollow” وده بيرجع للتراكم المفرط للسوائل في الدماغ ، لكن البروفيسور” Jim Horne” خبير النوم في مركز أبحاث النوم جامعة لوفبرا البريطانية رفض تشخيص الحالة بمتلازمة التعب المزمن ، و استبعد الدكتور “إيجور كوروفين” إصابة السكان بالفيروسات والالتهابات البكتيرية ، وحاول العلماء يحللوا التربة أو الماية لكن برضو ملقوش أي مواد كيميائية ممكن تسبب النوم .

وزير الصحة في كازاخستان كان فاكر في الأول أن السبب ممكن يكون الأبخرة اللي بيتعرض لها السكان في موسم التدفئة ، فبتبقي البيوت تهويتها سيئة، لكن مع تغيّر الفصول، واستمرار الوضع ، استبعدوا الاحتمال ده كمان ، فرجع تاني الوزير قال أن كان في مناجم يورانيوم موجود قريب من القرية زمان أيام الأتحاد السوفيتي و أكيد هو ده السبب ، وفعلا نزلت حملة قياس إشعاع على البيوت وفحصوا أكتر من 7 آلاف بيت قريبين من المناجم وكانت نتيجة الإشعاع عادية مفيهاش حاجة ، البيوت اللي قريبة من المنجم مستوى عالي شوية ، والباقي كله عادي ، لكن العلماء لقوا في عدد من البيوت ، آثاراً لعنصر الرادون ، الناتج من تحلل اليورانيوم ، لكن ده مكنش كافي لتفسير الظاهرة.

تعالوا بقي اقولكم حل لغز قرية كاليتشي!!

مدير المركز النووي الوطني في معهد السلامة الإشعاعية وعلم البيئة “سيرغي لوكاشينكو” قال أن السبب كان إرتفاع مستويات أول أكسيد الكربون والهيدروكربونات في الهوا وده أدي لنقص الأكسجين في المنطقة ، والمواد دي مصدرها المناجم اللي موجودة قريب من القرية وكانت مستوياتها واصلة لأعلى مراحله ، وده تفسيرا النوم المفاجئ اللي أصاب الناس وحتي الحيوانات في قرية كاليتشي.

لكن بعد اكتشاف السبب كانت خلاص القرية بقت مهجورة ، علشان الموارد الاقتصادية بتاعتها قلت جدا لقلة الأيدي العاملة ، (الناس كانت نايمة مش فاضية تشتغل) وده خلي أهلها يهجروها علشان يهربوا من النوم المفاجئ ، ده غير أن الحكومة قررت تسيب القريتين فاضيين عشان يتعافوا براحتهم ويرجعوا لمستويات الأوكسجين الطبيعية.